كتب: ماهر العباسي ( طبيب يرحم والديه ) نعاود وبكلّ هدوء * إلى حدّ الآن الوضع هادئ جدّا وتحت السيطرة عنا بعض المرضى في السبيطارات وأقل من عشرة يستحقو الإنعاش و6 وفايات . *الحالة الهادئة هذي تنجّم تتقلب في الجمعتين الجايين وتولي مئات المرضى في السبيطارات وعشرات المرضى في الإنعاش وعشرات الوفايات .. حتى كان هذا يصير يقعد الوضع تحت السيطرة . * ينجم الوضع يتقلب بصفة خطيرة ( أنا شخصيا أستبعد برشة السيناريو هذا ولكن يقعد ممكن ) مع آلاف المرضى في السبيطارات ومئات المرضى في الإنعاش ومئات الوفايات ويقعد باقي وقتها الوضع تحت السيطرة وإنجمو نجابهوه إذا كان يتفرض الإنضباط عالجميع ونجمعو المرضى في السبيطارات المجهزة لمقاومة الكورونا ونخرجو مالحكاية ببعض المئات من الوفايات إلي باش يكون رغم كل شيء حاجة خفيفة بالنسبة لدول عظمى كيما ايطاليا وفرنسا وإسبانيا * ينجم يتقلب الوضع بصفة كارثية ( بالنسبة ليا شبه مستحيل) وقتها نطبقو طب الحرب وربّي معانا و تكون عنا عشرات الآلاف المرضى منهم فوق مالألف يستحقو الإنعاش وممكن 2000 وفاة باهي عاود أقرا توة الفقرة الأولى : * إلى حدّ الآن الوضع هادئ جدّا وتحت السيطرة عنا بعض المرضى في السبيطارات وأقل من عشرة يستحقو الإنعاش و6 وفايات . شفت محلاه الوضع متاعنا شنعملو نحمدو ربي وإلا نتعاركو نتّحدو وإلا نتقسمو ... نعترفو بالجميل للناس إلي تخدم نهار وليل في وزارة الصحة مالوزير لنصاف بن علية لآلاف الجنود في قطاع الصحة ( حتى كان عنا إنتقادات) وإلا نسبوهم وونشيطنوهم إحمدو ربي يا توانسة وشوفو غيركم فاش يعاني والسلام.