انا صحفية و طول عمري معتنقة مذهب الاستقلالية وحرية التعبير، أرى اليوم أن النيابة العمومية عليها التحرك بأقصى سرعة اليوم لفتح تحقيق جزائي فيما حصل على القنوات ليلة الأمس الأمر خطير يمس بكل شيء، بحرية التعبير، بضمير المهنة الصحفية، بالسلامة النفسية و الصحية للمجتمع ، بالأمن العام الصحي كيفاش تدخلوا تصوروا في سبيطار مرضى مصابين بالكورونا ؟ كيفاش تدخلوا بالقوة و بالعرك و بالشتائم لمركز حجر صحي و بالسيف تصوروا أشخاص محتمل إصابتهم بالكورونا ؟؟؟ يا قضاء تحرك راك انت المسؤول على حماية الحريات التي انتهكت بالأمس و مسؤول على احترام القانون وزير السياحة و وزير الداخلية عندكم مسؤولية التحقيق فورا في الفوضى اللي صارت في مدخل النزل ليلة الأمس وزير الصحة عندك مسؤولية التحقيق فورا كيفاش تحل السبيطار و كيفاش تصوروا المرضى في حجر صحي في المستشفى دون أي مراعاة لقواعد الوقاية و الحماية الصحية التي كان من الواجب تطبيقها بكل دقة حتى يكون العمل مستجيبا للمعايير المهنية المزدوجة لمهنة الصحافة و لمهنة الطب هذا لعب خطير و استخفاف سافر بالأمن العام الصحي و بارواح الناس وزير مكافحة الفساد عندك مسؤولية جسيمة تحل فورا سلسلة من التحقيقات الجدية : فاش تعمل هالقنوات شنية المهمة و الأجندات اللي مكلفة بيها شكون يمول فيها كيفاش خذات التراخيص شنية الشفافية المالية متاعها مدى احترام هيئة التعديل لكل القوانين و لكل الإجراءات عند اتخاذها قرار منح الرخص بالبث و عند اتخاذها قرار تغيير صبغة قناة من جمعياتية الى تجارية،يلزم ايضا فتح تحقيق عميق و جدي في ملف اصلاح الاعلام العمومي و مليارات الاوروات التي صرفت و تصرف عليه دون جدوى دون أن نرى نتيجة أو تحسنا دون أن يسمح للاعلام العمومي أن يصبح قويا قادرا على دحض الأسطورة الواهية لجزء من الإعلام الخاص الرديء و المسيء دون أن يستطيع الحصول على اهتمام الناس و تحقيق نسبة المشاهدة العالية ، رغم أنه قادر بسهولة على تحقيق ذلك، بربي حل تحقيق جدي و سريع و عميق و غيرو النقابة متاعنا اكثر من موقف إدانة ما عندها ما تضيف خاطر الجماعة ماهمش منخرطين فيها هيئة التعديل عاجزة و حايرة اكثر ما تنجم تعمل خطية مالية ( الجماعة عندهم ابار فلوس يغرفوا منهم موش باش يتقلقوا بالكل)، و الا تمنع عرض البرنامج لمدة شهرين ( يعاودوا يخرجوا نفس التافهين يعملوا برنامج بعنوان آخر تتليفي أو حتى استفزازي تهكمي على قرارها، و لكن بنفس المحتوى و نفس الغايات الوضيعة و الإجرامية، و للتذكير ايضا فمة شكون ارعب شعبا كاملا وعمل فيديو تشارلوك هولمزية قال راني اكتشفت اسرار و راني نعرف شكون قتل البراهمي و بلعيد و راني هربت متخبي في سويسرا مهدد بالقتل، و من بعد طاح الكاف على ظلو كاينو ما صار شيء رجع للبلاتوهات و هو أكثر واحد عندو حظوة عند الحكومة و الوزراء كل يوم يحضرولوا ثلاثة واربعة، و لا كيفاش و لا علاش و لا تحاسبنا على الحسبة القديمة ، سكرنا الدوسي و نسينا كيما سكرنا دوسي الرضع اللي روحوا لاماليهم في كرضونة، وسكرنا دوسي صفقة اللوالب القلبية الفاسدة، سياسة الهروب إلى الأمام و التعويم) المطلوب توة انو كي تحرك النيابة العمومية الدعاوى من تلقاء نفسها فيما وقع على التاسعة و الحوار ليلة امس، ما يتكلم حتى حد و يخلط الأمر مع حرية الصحافة و حرية التعبير انا أول واحدة تدافع على الحرية و تمارسها، من قبل موش بعد 2011 المسألة مبدأ شخصي و قناعة راسخة في جيناتي موش لاموضة ، الأمر الذي وقع بالأمس ( و وقع سابقا عدة مرات .. ) لا علاقة له لا من قريب و لا من بعيد بالحرية و لا بالصحافة و قواعدها و أخلاقياتها بربي طبقوا القانون بربي المحاسبة المحاسبة المحاسبة !!!
