عنا أربعة سنين أنا وأصحابي نصيفو في جربة .... جزيرة من أروع ماريت في العالم ..... مناظر طبيعية ... بحر يقتل ... ماكلة بنينة ... وخاصة ناسها من أروع ماريت في حياتي ... تربية وأخلاق وكرم ضيافة وتواضع والإبتسامة ديما عالوجه والكلام المزيان والقلب الأبيض الصافي ... أنا درت تونس حومة حومة وقليل وين ريت ناس في طيبة وتربية الجرابة ... واليوم راو عيب علينا نخليوهم وحدهم في مجابهة المرض قال شنوة منطقة موبوؤة ... كان جربة موبوؤة رانا بكلنا موبوؤين ... وكان باش نخليو أخواتنا يموتو في جربة ويتعامل معاهم الي يسوا وخاصة الي مايسواش كأنهم عندهم الطاعون ... فسحقا لنا والله لا نستاهلو صفة الإنسان ..... مرة أخرى يا قيس سعيد في يدك تحل المشكل هذا بقرار ... تبعث ثلاثة طبة إنعاش مالجيش الوطني الليلة يباتو في جربة ويداويو أهلها الي هوما عزاز علينا برشة ... وكان مالقيتش غدوة تبعث طيارة تروح بطبتنا الي في إيطاليا .... الصدقة ماتصح الا ما يتداواو أمالي الدار .... وبالنسبة لأهالينا اعزاز الغالين في جربة ... صبرا جميلا ...شدة وتزول ... ورانا مستحيل نسلمو فيكم .