مصيبة كبيرة عملها الإخشيدي .. هاو قالو الفرنسيس والأمريكان والألمان متغشّشين علينا ... كيفاش يصير ؟؟ توة هذا كلام ؟؟؟ مزلس أعلى للقضاء ويا من دراك يحلّو الرئيس..؟ تي راهم " الديمو " متاع الديمقراطية وحقوق الإنسان وقلبهم دم على التوانسة ..اللي خسرو مكسب هام متاع ديمقراطية وكذا... وزيد لو كان ما يحبونا "المان وفرنسيس ما يزورونا" هه الحق ...الحق قلبي وجعني على تونس ... وبعد تفكّرت ... توّة بن علي وقت كان يعبر ويحكم في المحاكم والدوسيات متاع الطرابلسية زعمه تكلمت ها الجوقة هاذي كلها ؟؟؟ على ما نتذكر ..إلى آخر أيامو والفرنسيس كانو ماشي يبعثولنا " كولي" متاع قنابل مسيلة للدموع باش بن علي يواجه تحركات جانفي 2011 وإلا أنا غالط ؟؟؟ باهي والأمريكان متاع " ربّ الديمقراطية وحقوق الإنسان " ؟؟؟ على ما أعلم قوانتانامو ومعتقل أبو غريب موش التوانسة اللّي عملوه ؟؟ حاجة أخرى " بونيس Bonus " ياخي حلفائكم في الإمارات والسعودية وقطر ومن والاهم عندهم " مجلس اعلى للقضاء " ؟؟ إيه آش عملتولهم ...عبرتولهم على " قلقكم العميق " ؟؟؟ . .كنت باش نحكي على إنجازات وفضايل "المزلس "الأعلى للقضاء لاستماتو في محاسبة الفاسدين ومقاومتو للإرهاب وسعيو الدائم لتنظيف القضاء ومن بعد قلت " اذكروا موتاكم بخير " ..خلّي عزاها سكات ...