يمكن فات الفوت… يمكن كل يد خذات اختها… ويمكن التراتيب القانونية تعملت والمشروع في التصحاح… اما ما نيش باش نبخل علي بلادي بصرخة يمكن ثم اشكون من العقلاء في الاستماع… علاش معلم كيف هذا يحبوا يردوه مكتبة رقمية؟… علاش ما يعملوش كيف الاكروبوليوم متاع قرطاج تنجم تعمل فيها جميع انواع الفنون من غير ما تمس فيها حجرة… علاش في صفاقس باعولنا فكرة قديمة علي انها ما صارتش عند العرب وافريقيا… اشنية مكتبة رقمية؟ اليوم الحاسوب ولي مكتبة رقمية، الهاتف الجوال مكتبة رقمية، اول حانوت دي في دي مكتبة رقمية… الكتبات العمومية مرقمنة… المسالة ماعادش تحتاج نخصصولها مكان كيف هذا ونصرفو عليه عشرين مليار؟ لوكان تشوفوا المثال الهندسي الي عملوه يحشم بخلاف الي هو يشوه المعلم التاريخي جملة فيه طابق اول وطابق ثاني واسانسير وحاجات معلقة في السقف مقسم طروف طروف ما جاء حتي شيء… بعد ماصارت المناقصة ظهرت الي المكتبة الرقمية تتكلف بعشرين مليار… اي نعم عشرين مليار باش نطمسوا المعلم هذا … مليار ونصف تهيئة المساح الخارجي وثمنطاش مليار ونصف تهيئة الفضاء الداخلي… يلزم الناس تعرف الي المشروع هذا بلع الاموال المخصصة للبنية التحتية في تظاهرة صفاقس عاصمة الثقافة العربية بمشاريعها الاربعة: الكنيسية وشط القراقنة وتنوير سور صفاقس وترميم المدرسة الحسينية… الفلوس المرصودة للمشاريع الاربعة الكل لهفتهم المكتبة الرقمية ضربة وحدة…وطاحت المشاريع الاخري في الماء… تو هذا معقول؟ زيد علي ذلك ان المكتبة الرقمية اذا تمت كيف ماهو مسطر الآن ما اتدخلش فلوس وتحتاج الي خمسة مائة مليون سنويا كمنحة تسيير بربي اشكون باش يخلصهم؟ معملين علي الجهة؟ معملين علي وزارة الثقافة؟ من تو نعرفوها باش يدشنوها وتخدم شوية ومن بعد تتقص عليها الاعتمادات وتتسكر… ويصيرلها نفس المصير متاع الجسر المتحرك الي خدم كان نهار التدشين… علاش ما يخليوهاش كيف ماهي وتصير فيها تحسينات لكتمان الصوت وتحويرات بسيطة لتحويلها الي قاعة متعددة الاختصاصات وتتسع لكل الفنون وصفاقس كاملة تستنفع منها والفلوس الي كانت بكلها ماش تمشي في تهيئة المكتبة الرقمية الي ماطالب بيها حد في الجهة تولي تتقسم علي المشاريع الاخري ويكمل كل ماهو كان مقرر…بالطريقة هذي الكنيسية تولي دار الفنون متعددة الاختصتصات بما في ذلك ركن للمكتبة الرقمية وهكة تنجم تولي عندها مداخيل وتنجم تصرف علي روحها وماتقعدش عالة علي حد وتضمن لروحها البقاء… هذي صرخة الي كل من يهمه الامر… صرخة الي اولاد الجهة صرخة الي اصحاب القرار… صرخة الي المجتمع المدني الي الفنانين والمثقفين … اوقفوا هته الكارثة قبل فوات الاوان… بلادنا لم تعد في حاجة الى اعادة انتاج مشروع المدينة الثقافية مرة اخرى في صفاقس…
