شيعت بيروت اليوم الموسيقار الفنان ملحم بركات إلى مثواه الأخير وسط حضور عدد كبير من الفنانين والسياسيين إضافة إلى أهله، وقد كان التوديع بالموسيقى وأجمل ألحان الفقيد تنفيذا لوصيته. الفنانة ماجدة الرومي نعت الفنان وكتبت إليه النص التالي اليوم باللهجة اللبنانية: "من ماجدة الرومي الى ملحم بركات مبارح، من عَزا إمي للعَزا فيك ومن دير القرق في كفرشيما لكنيسة مار بطرس وبولس كفرشيما قطعت المسافة بضيعتنا الصغيرة وانا قلبي عم يعصرو الأسى وأنا عم بسمع صوتك طالع من كل شارع وحي.. وصوتك نفسو نفسو يا ملحم يلي فرّحني العمر كلّو مبارح نفسو نفسو ما ترك بعينييّ دمعة وحدة إبْكِيها. وهيي نفسها نفسها شوارع كفرشيما يا ملحم يلي تمشّينا عليها بضيعتنا صغار وزهّرتلنا صغار وضحكتلنا صغار وهديتنا كل ربيع وكل أمل هي نفسها نفسها مبارح شفتها خريف حزين مستعد يرمي كل وراقو ويبكي معنا ويكتب معنا ع صفحة تشرين الاول 2016: (كلّو رايح وج الله بس وحدو اللي باقي) .. وشفت الدنيا حزينة عليك مثلنا وبتحبّك مثلنا ورح تشتقلك مثلنا وتقول لكل جيل جايي بعدنا إنك من أعظم الاصوات يلي مرقت على هالشرق إنك صوت اذا رَق بيبكّي الحجر واذا جن بتنحِنيلو العاصفة واذا تجلّى بتِخْضَر فينا جَنّات وانك جملة لحنية متفوّقة عريقة رح تبقى درس بالاصالة لكل عاشق موسيقى اليوم وكل يوم ولتنتهي الايام.. ابو مجد يا حبيب اللبنانيي وكل العرب يا ابن كفرشيما البار مهما بعّدتنا الايام رح نرجع نلتقى هيدا إيماننا بالله "...