الحمد الله اللي نسكن في بلاصة لا عندنا فيها فقاع.. سامّ وإلاّ ماهوش سامّ.. الحمد الله اللي ماحبيتش نسكن في الريف.. وإلاّ في غابة.. وإلاّ في جبل.. ما كانش راني بلعت السبادري «عافوا الفقاع» ماك العام.. وإلا راو واحد من أولادي مشى ضحية.. تمخميخهم.. آما ما يغركمش اللي ما عندناش فقاع في المدينة.. أحنا عندنا ما هو أسمّ من الفقّاع.. الحليب العربي الفاسد.. أسم من الفقّاع.. والياغورت اللي إنتهت مدة صلوحيتو يقتل كيف الفقاع.. والدلاع المزرّق.. يهز للجبانة كيف الفقاع.. الايسونس والمازوط المغشوشين يقتلو كي الفقاع.. تلوث الهواء.. يقتل كيف الفقاع.. الانحطاط الاخلاقي والكلام الزايد سام أكثر من الفقاع.. حرقان شبابنا وغرقانهم يقتل أكثر من الفقاع السام..مستنية الكار في عز القوايل.. تركب أمراض أكثر ماللي يركبها الفقاع السام.. الصفوف في السبيطارات والإدارات.. تقتل أكثر من الفقاع السام.. العين البصيرة واليد القصيرة.. تموت أكثر من الفقاع السام.. المعارف والاكتاف.. تقتل كل يوم أكثر من الفقاع السام.. الغلاء والكواء.. والعراء.. وقلة الأحياء تقتل أكثر من الفقاع السام.. علاش نظلمو فيه الفقاع.. عندنا ألف فقاع وفقاع سام في المدينة.. يقتلنا كل يوم ألف مرة ومرة في النهار.. الرشوة تقتل.. المحسبوبية تقتل.. البيروقراطية تقتل.. الزبابل الملوحة في الكياسات تقتل.. الحفر اللي في الطريق تقتل.. الناموس يقتل.. الفيضانات تقتل.. العنف في الملاعب يقتل.. التحرش الجنسي يقتل.. الغبرة والزطلة تقتل.. الفن والكليبات بوفاضح تقتل.. المسلسلات المكسيكية والتركية تقتل.. برامج التلفزة تقتل.. أسوام الديار والاراضي تقتل..فاتورات الماء والضو تقتل.. الأداءات تقتل علاش نظملو فيه الفقاع.. آش قتل مسكين أربعة من الناس.. ومرّض 50 ؟ واللي يقتل كل يوم بالآلاف ويمرّض بالآلاف علاش ما نتكلموش عليه ونعملو عليه ندوات وحصص وبرامج مسكين الفقاع.. راس الهم دادا عيشة.. شي يخلي مرارة الواحد تتفقع.. أما موش من الفقاع البري اللي يجي في الخريف.. أما من الفقاع السام اللي عايش معانا كل يوم.. وناكلو فيه كل يوم.. ونمرضو بيه كل يوم.. ويقتلنا كل يوم.. ولا حسيب ولا رقيب.. مسكين الفقاع اللي في الكاف والقصرين وسليانة.. شكلاطة يظهر قدام فقاع المدينة سامحوني حبيت بركة نفقع هالدّمالة...