مرحبا بيك سيدي 2009 من قبل ما تدخل ظاهر عليك.. وكيما يقولوها.. من نفقتو باين عشاه.. بديتها بحرب غزة.. وقتلت فينا الكرامة والعزة.. كل عام نقولو.. الله يعطينا خير العام الجاي.. وهاو الخير بدا يدز من قبل ما تدخل.. أزمة عالمية ..مالية.. نفطية..غذائية.. وفي فلسطين حرب إسرائيلية.. وحرب فلسطينية فلسطينية.. وأحنا مازلنا نتحاربو على خبزة القاطو.. والدجاج الروتي.. وفي أنا أوتيل نسهرو.. والراس نعمرّو.. ونشطحو.. مرحبا بيك ,.2009 طلتك طلة خير.. والقافلة مع عمنا أوباما تسير.. وأحنا شايخين.. ودايخين.. مسطولين.. إلي يخمم في العرس ..ومازال يستنى في الزيادة ومازال ومازال.. واللي ضايق بيه الحال.. واللي يقول دوام الحال من المحال.. مرحبا بيك 2009 .. إستقبلناك بالهلالو.. واذا تبدا على هالدزّة.. ما عادش نسمعو بيها غزّة.. بعد ما نسينا العراق وحلفنا عليها بالطلاق. مرحبا بيك 2009 إنشاء الله تدخل بساقك اليمين.. باش ينقص على الزواولة الدين وإنشاء الله تكون قدم السعد.. على اللي قرا وصرف وجبد.. وما لقى لا معارف.. لا أكتاف لا حد.. إنشاء الله تكون قدم الخير.. ويزيد فيك الخير والخمير.. ينقصوا فيك القلابة.. والنشالة والشقلابة.. واللي يحطوا شاشية هذا على راس هذا.. إنشاء الله تتزاد الشهاري.. وترخص الأسعار.. وقفتي تولي على قد كاري.. وكاري تولي مواظبة قدام داري.. وملاك نولي بدراي.. وما نموتش كاري.. ويحكم فيّ عطاري وخضاري.. وجزاري.. إنشاء الله بقدومك تتحسن الاحوال.. وتزيد الاموال.. وما يصبوليش الكمبيال.. وإنشاء الله ما يقعد حد بطال.. ولا يحرق حد لبر الطليان.. والألمان.. والإسبان. ولا يقعد حد مُسال ومَرهون.. وغارق في الديون.. وما يعيش حد مغبون.. ولا ظالمو القانون.. مرحبا بيك 2009 إنشاء الله بقدومك نقعدوا سالمين.. آمنين.. كيف ما كنا على مر السنين.. وإنشاء الله ديما ضاحكين.. فرحانين وإنشاء الله ربي يجعلنا ماللي نسالو موش بالموسالين.. وشهرياتنا تخلط في الحين.. لا بعد نهار وإلا نهارين.. أما جماعة غزّة والفلسطينيين..إيلي وايلهم ربي رب العالمين.. مادام العرب راقدين..شاخرين.. مادام ربي جعلهم من سكان أهل الكهف... الميامين.. قولوا معايا آمين.. وإن الله مع الصابرين. فيصل الصمعي للتعليق على هذا الموضوع:
