ساعة ساعة تلقى روحك ماشي حي بكلو طباعي وحفر وقلت وزبل مزرعة على المادات وفي شارع معبي بالساشيات اللي تخرج منها روايح تقول عليها أسلحة كيمياوية وإلا أسلحة دمار شامل تسأل على إسم الحي يقولولك حي الرقي.. والا حي الرياض اللي ما تشوفش فيه قراضو رياض من بياعة الفريب والسيديات وحوانت كراء البافلوات وعبي بالبالة يا كمالة كإنو ديوان ورغلية لا يرقد لا ليل ولا نهار.. وساعة ساعة تهز راسك تلقى روحك في نهج الاخاء والاخوة والاحترام والتسامح.. وتبدا تشوف في التسامح بين زوز نساء يقطعوا في شعورات بعضهم على خاطر عركة متاع زوز صغار والا متاع سطل زبلة وتشوف الاخوة مكبشة في بعضها على المصروف وتشبع بالاحترام المتبادل بين راجل ومرتو على كريدي العطار.. وساعة ساعة تهزك ساقيك لشارع الفرح.. تلقى الفرح مبزع على سطوحات الديار يبدا بيا عمي الشيفور ويوفي يا حاكم إجريلي.. وتسمع تعبيرات الفرح خارجة أسرع من نشرة الاخبار.. وتشوف شماريخ الفرح تتطاير مع حكك البيرة وشقوقات المرناق.. إذا ما عبروش عن الفرح بطرشيقة بوسعادة والا سيف دياري.. ويتحول الفرح الى باطوار.. وترصي الكل بين المركز والسبيطار.. وعلى ذكر الفرح.. نعرف وحدة إسمها فرح اما ما تكساب من الفرح كان إسمو.. تلقاها ديما مكشبرة وعاقدتها تقول هاززة هموم الدنيا على ظهرها.. تعمل زردة اذا نهار تنجم تشوف سنيها بوها سماها فرح باش تفرحلو الايام زعما زعما.. طلعتلو كيف بوكشاش.. اللي يقربلها تكبش في خناقو.. ويفقد من ذاكرتو كل عبارات الامل والتفاؤل والفرح.. ساعة ساعة كيف فرح تحب تفرح.. تحط جنازة ديانا وعبد الحليم وأم كلثوم على الفيديو وتعقد عاملة جو..خطبوها برشة والكل رفضتهم واللي ترفضو يخرج ديمة فرحان بعدما يشوف تباشير الفرحة على وجهها المكشبر وحواجبها المقرونة.. ويبدا يحمد في ربي بالكمشة اللي منعو من فرح وفرحة العمر وأهيكة لتوة مكهبة على الاربعين.. ومازالت فرح تستنى في الفرحة وأمها تقول: يا فرحتي يا هنايا ..بفرح بنتي اللي يحوزها يحوز الدنيا وفرحتها.. يا والله فرحة ويا والله فرح.. وإنشاء الله كل عام وأنتوما فارحين..
