يا خويا اللّي نشوفو عند التونسي ما نشوفو عند حدّ.. واللّي تلقاه عندو ما تلقاه عند حدّ.. لاعند ألمان ولا أنقليز ولا فرانسيس ولا صينيين ولا كوريين ولا حتى في جزر القمر وإلا جزر الواق الواق.. ما يتشدّش تلقاه ديما كيف الحوتة يتزلبط بين الإيدين.. لا تعرفو فرحان وإلاّ متغشش زاهي وإلاّ مكشبر.. شايخ وإلاّ دايخ.. تجي تشوفو تلقاه شايخ.. حوايج وكراهب وديار وبرطابلوات.. وسهريات وقعدات وفي نفس الوقت تلقاه يشكي ويبكي هاو قينيا.. هاو ميزيريا تسكسك.. هاو فلوس ما ثمّاش.. تجي تشوفو من ناحية أخلاقو.. تلقاه من شيرة السياسة والكياسة واللّسان اللّي يغزل الحرير.. يبيعك ويشريك بكلمتين.. ومن شيرة أخرى.. الأخلاق الفاسدة والخلايق العادمة.. واللّسان الموذي.. تكلّمو توحل فيه.. تسيبّو يكبّش فيك.. تطلع معاه يطلع معاك.. ترخيه يزيد على ما وصّاووه.. وموش يسمّعك وسخ وذنيك برك.. يزيد يوريهولك كان تحب من ناحية ال «galanterie» تلقاه galant من ناحية «Souplesse» تلقاه لاستيك.. من ناحية الرقعة ما فمّاش ما أصحّ منها كانو يخدم يقلّك يلعن بوها لخدمة.. وكانو بطّال يقلّك ما ثمّاش خدمة ويلعن بو البطالة.. وكان دبّرتلو خديمة يقلّك.. البطالة خير اللّي خدمو ماتو.. التونسي بصراحة ما يعجبوش العجب ولا حتى الصيام في رجب.. كان خذا مرا تخدم يقلّك والله كان خذيت وحدة قاعدة في الدّار خير.. وكان خذاها بنت دار... يقلّك واللّه كان جات بشهريتها على الأقل تهز معايا وذن القفة.. كان خذاها طويلة.. تبدا عينو على القصيرة.. وكان خذاها قصيرة عينو ديمة على الطويلة.. أما نهار اللّي يعرّس يولّي يحبّ على اللّي لبستها محتشمة ولا تعرّي ولا تورّي.. يسبّ العرا والقرا وقلّة الحيا وكلّ ليلة يسهر يتفرّج على كليبات هيفاء وروبي ودينا بالسرقة على الجماعة.. التونسي يموت على البوبلاش.. ورزق البيليك.. ماذا بيه يبدا راقد والشهرية تجيبه تدق عليه باب بيت النوم.. وديما يشكي ويبكي.. ويلوم ويتبكّى.. أعطيه على شكون يتكى.. التونسي عمرو ما يرضى.. تقلّو الشتاء صبّت يقلّك نعمة من عند ربّى أما طباعي وقلت.. تقلّو الطقس ربيع.. يقلّك نعمة آما ثمّة شوية عجاج.. تقلّو الطقس صيف يقلّك نعمة أما قمّة شهيلي.. والدنيا غاطة وعروقات تسلت وفدّة.. قلّو الطقس خريف.. يقلّك كساد والجوّ مكرفص كان قعد صيف خير.. كان جات عطلة يقلّك وقتاش ترجع القراية.. كان جات القراية يقلّك وقتاش ترجع العطلة.. برامج التلفزة ما تعجبوش.. وبرامج الإذاعة ما تروقلوش.. والبطولة ما تلعبوش ولومار طافي وما عندوش.. وبن يحيى ما حقوش.. ولا عاجبو صيود ولا حسن مالوش.. ولطفي بوشناق ما يشطحوش.. ولاهو مع نجاد ولا جورج بوش.. التونسي يموت على بلادو أما كان يلقى هجة يهجّ وكان يلقى حرقة يحرق.. حتى لو كان يعرف روحو باش يغرق.. التونسي كيف قالب الصابون قد ماتحاول تشدو.. يفلت بين إيديك(!!) فيصل الصمعي