مرتجى محجوب فيضانات, اموات, مفقودين, خسائر مادية فادحة, جوع ,التهاب اسعار, دواء مقطوع, تعطل للمواصلات, تعليق للدروس ,بطالة ,فقر, مخدرات ,كحول, دعارة, براكاجات,حرقة, عنف, بذائة ,قلبة , كساد, قينيا ,احباط ,ياس, خوف ... و الجماعة لفوق موش هنا مولى الدار ! واحد يقابل في السفراء و زعيم اخر يخطط كيفاش يكون مشروعو و حزبو السياسي المستقبلي و كمشة طماعة يستناو في التحوير الوزاري فماش ما يحصلو بليّصة بعد القفة اللي هزوها المدة اللي فاتت ...و القاسم المشترك بيناتهم انهم جميعهم يدافعوا عالاستقرار الحكومي و يقولونا الّي التغيير موش باهي و كانو بعد ما وصلنا للقاع مازلنا نجّمو نطيحوا اكثر او نحفروا اعمق ! اتوجه لابناء شعبي المناضل في سبيل الحياة و الوجود لاقول لهم : للاسف ما يلزمناش نعولوا عالجماعة هاذوما الي يحكموا فينا و الّي بلانا بيهم ربي و خصوصا في ظل الاوضاع الماساوية الي نمروا بيها و ما عنّا كان خيار اللحمة و التضامن بيناتنا : القوي يعاون الضعيف و المقتدر يكرم الزوالي و كل قدير و قدرو و الدنيا فيها الموت و مولاها ربي و اشتدي ازمة تنفرجي بحول الله السميع العليم .