بعد اعلانه عن تنظيم جلسة انتخابية للتقييم والتغيير يوم 16 جوان المقبل فتح سليم الرياحي رئيس النادي الافريقي النار على بعض من هاجمه ونعته بأبشع الشتائم وقال سليم الرياحي على صفحته الرسمية على الفايسبوك : "شكرا للناس الّي ساندو سليم الرياحي ومن وراه النادي الافريقي وشكرا للناس الّي ما توقفوش منذ مدّة عن اعطاء الدروس لسليم الرياحي بمناسبة وبدون مناسبة يذكّرو فيه " أنهم ما يتشراوش بالفلوس " و أنو " الجمعية ما تاقف على حد " وأنو " ماعالابالهم بسي فلان " وأنو " سليم الرياحي يخدم بجمهور الافريقي " وأنو " يمشي للجحيم هو وفلوسو " وأنو " فيبالو بش نشدّو فيه يبطى شويّة " وأنو "يعمل في السياسة وكيف عمل اسم بش يخلّي الجمعية ويهرب " وأنو " ارتحنا من فلوس الحرام و فلوس القذّافي " وأنو " الرياحي كذّاب وماعندوش كلمة ويعمل في حملة انتخابية " ,,,,,,,,,,الخ الخ الخ وقائمة طويلة من الشتائم الصادرة وهذا الأدهى والأمر من جمهور النادي الافريقي !!! على كل شكرا جزيلا لكل هذه المشاعر وأنا بالفعل بصدد الاكتشاف ، كل هذا لأني قلت أننا سنذهب الى جلسة عامة انتخابية في جوان القادم للتقييم والتغيير ، وأنا خذيت هذا القرار بش نمنح الفرصة حتى للناس هاذم الّي عندهم هذا الرأي في سليم الرياحي بش يجيو ويعبّرو عليه هوما أيضا مادامهم يحبّو الافريقي ويغيرو عليه أكثر من سليم الرياحي . بوضوح نقول للجميع ، التزامي مع الافريقي هو التزام مع تحدّي شخصي في النجاح وهاذي طبيعة تربيت عليها مالطفولة ، يعني ليكن في العلم أن التزامي الوحيد هو تجاه نفسي وقت الّي نقرّر حاجة نمشي فيها حتى النهاية مهما كان الثمن وما يردّني عنها الاّ الله الّي نعرف أنو ما يكون كان مع العباد أصحاب الارادة والتصميم ، بكل وضوح أيضا أقول الّي يعتقد أنو سليم الرياحي طامع فيه في أي مجال كان وخاصة في السياسة هو واهم وأنا لا أحتاج الاّ لتسهيل وبركة رب العالمين . مؤسف حقيقة أنو كلام عادي عن جلسة انتخابية للتقييم والتغيير يخرّج كل هالمشاعر الدفينة من النفوس تجاه شخصي لمجرّد أنو أشخاص غير قادرين يفهمو معنى مشروع أو التحوّل الى شركة تجارية أو التزامي بأني لن اترك الافريقي الاّ وأنو أصبح قادر على أن يموّل نفسو بنفسو دون أن يحتاج لأحد !!! فرصة أيضا كيما توفرت للناس بش يعرفو سليم الرياحي ، تتوفّرلي أنا أيضا بش نعرف الناس ."