ممنوع ع الرّجال و أحنا ما إستانسناش فمّة حاجة ممنوعة على الرّجال، حكاية صحيحة على قناة نسمة0 و من غير ما نطوّلو هدرة على خاطر أكيد النّاس الكلّ شافو الإشهار و عرفوا إلّي هو البرنامج الجّديد في الثّلاثاء النّسائي للقناة0 سمفونيّة عازفات على مقامات مختلفة بقيادة كوثر بودرّاجة0 البرنامج يتعدّى كلّ ثلاثاء التّسعة و نصّ متاع اللّيل بتوقيت تونس و يشبّه لحاجة تعملت في قناة فضائيّة توّة مدّة ثمانية سنين0 أمّا النّواعم المغاربيّات بدّلو اللّوك متاع البرنامج على الطريقة المتوسّطيّة0 و على حسب الكلام إلّي تقال في المؤتمر الصّحفي، الأجواء مليانة بالتّقليدي و المودرن0 معناها نفهمو إلّي الجّدّة و الأمّ و البنيّة ينجّمو قعدو مع بعضهم قدّام التّلفزة بكويّس تاي ولاّ قهيوة عربي0 كوثر بودرّاجة إلّي قالت إلّي هي فخورة بالإيكيب متاعها، هي المقدّمة الرّئيسيّة للبرنامج0 معاها أربعة نساء من ثلاثة جنسيّات مغاربيّة كلّ واحدة فيهم تقدّم فقرة خاصّة: ياسمينة الأصفر من المغرب ، ريم بن مسعود من تونس، سليمة عبادة من الجزاير و كوثر الباردي من تونس0 كلّ التّفاصيل على البرنامج في الفيديو0 أوّل حلقة اليوم، معناها نهار أربعطاش و منها باش نشوفو نساء المغرب العربي أش ناوين يعملو0
