أنا واحد من الناس ما عاد فاهم شي.. كل عام يطلعلنا بطلعة ما أنزل الله بها من سلطان.. وخلاونا كي الكورة بين الذكورة ..واحد يطيش لواحد.. عام يقلك فمّة concours سنة رابعة، العام الي بعدو يلغيوه.. عام يقلك لغينا concours السيزيام العام اللي بعدو يرجعوه.. مرة امتحان النوفيان فمة.. مرة ما فماش.. وأحنا ووليداتننا حايرين.. موش عارفين وين مقبلين.. كل عام تبدا إيدينا على قلوبنا.. زعما بأنا طلعة باش يطلعونا بيها قريب كل عام يولي كنكور.. حتى اللي في السنة أولى قريب يعملولو كنكور.. لين يتضرب يجي يدور... ويا ريت فمة نتيجة.. القراية ماشية بالتوالي.. والمستوى راجع لتالي.. ووليداتنا ولات ثقافتهم ثقافة أسمر ومهند والمسلسلات التركية والسورية والافلام الهندية والمصرية واذا حبّو يرجعو للهوية ما يلقاو كان السبوعي قدامهم والضحكة متاع واحد بوهالي.. وفي الفن ما فمة كان يا ميمتي الغالية وعلى الجبين عصابة وأضرب الحمدي يا بن عمي يا.. والجماعة عزوزة ما يهمها قرص.. هي هاززها الواد وهي تقول العام عام طهمة.. يا ولادي.. فهْمونا... نوْرونا.. شركونا.. عرّفونا وين نحطّو ساقينا ..فين ماشين.. ما تخليوناش ندهدصو في الظلام.. قولولنا une fois pour toute فمة كاتريام وإلا باش تتنحى على طول ..فمة نوفيام وإلا لا..فمة سيزيام وإلاّ لا.. فمة باك والاّ لا.. فمة قراية والاّ لا.. يظهرلي موش برشة عليكم وموش برشة علينا.. جيتكم بجاه ربي.. بجاه وليداتكم.. اللي هوما وليدتنا زادة.. إحسبونا موجودين.. وما تخليوناش كي العمي...وما تردوناش كي الزوج الدغف.. هو آخر من يعلم؟ وضّحونا أمورنا على الاقل لجيل كامل قادم.. للتعليق على هذا الموضوع: