السذاجة و التبهليل والميوعة : هي أنك تتعاطف مع مجرم، قلة الوعي هي انو مواطن باش يمشي ينتخب يقررلي مصيري و مصير بلادي و اولادي و اولادكم تلقاه ما عندوش قدرة انو يحسم موقفو من المجرمين و الفاسدين و السراق و يدوخ من كلمة حلوة . انك ما تحبش تصوت لواحد موش معناها تتعاطف مع المافيا . وما نفهمش السذاجة متاع بعض التوانسة اللي يصدقوا الوعود الرنانة اللي اغلب المترشحين يوعدو في وعود كاذبة غير واقعية : اللي باش يجمد دفع ديون تونس و اللي باش يجيبلنا مستثمرين على خاطر سيادتو رامبو متاع علاقات و عندو الفلس متاع الاستثمار الخارجي و اللي باش ينقح الدستور و هو ما ينجم يجيب حتى نائب في البرلمان و يعرف اللي الدستور ما يتنقحش بالاستفتاء . و اللي باش يعمل ثورة اقتصادية في افريقيا و كي تقلوا منين الفلوس رانا دولة فقيرة و نكذبوا على رواحنا يقلك نجيبوها من عند المتهربين و كي تقولو كيفاش باش تجيبها من عند المتهربين ياقف حمار الشيخ غادي و ما تلقاش اجابة . و اللي يحكي على الديبلوماسية الاقتصادية و هو عمرو ما حل مشروع حتى متاع كفتاجي . قمة قصر النظر و الكذب و الشعبوية و الوعود الكاذبة. كل المترشحين يكذبوا . واحد يزف زفان و الشوية لخرين يعملو كذبات خفاف و الشعب يصفقلهم الكل . اكبر جريمة سيرتكبها الناخب في هذه الانتخابات. شخصيا خايف على بلادي موش على روحي لاني لن اكون معنيا حتى بمهنة الصحافة بعد مدة قليلة الا بحضور لا يتجاوز 10 % من حضوري الحالي باش نمارس الدودة الكلبة . ما عادش عيني و ما عادش نحب ولادي يقراو و يسمعو ناس امسخة تسب فية على خاطر مرشحهم ما يعرفش يجاوب . كرهت السياسة و الصحافة من ممارسات بعض السياسيين و المافيا و الفساد و المجرمة و رجال الظل اللي عنهم بيادق مرشحينهم يكوروا بيهم . كرهت الخطاب الجهوي : هذاكا صوتولو خاطرو مرشح الساحل و لاخر مرشح الوسط و لاخر مرشح الجنوب و لاخر متاعنا من اجل المشروع الاسلامي الخ الخ ... ما فماش فيكم عاقل يقول هذا عيب ؟ راهو لازم مرشح تونس ؟ مرشح عندو قدرة باش يصلح ؟ عندو تجربة ؟ ما تحضرش شوية المادة الشخمة ؟ ياخي بكلنا ما فاهمين شي و الروبوات متاع فايسبوك هي اللي فاهمة و تهز فيكم كيما تحب في الثنية اللي تحب ؟ "
