بلهجة قابسية عامية مفعمة بالتلقائية والصراحة كتبت المدونة الشابة ريم ثابتي الشهيرة بكنية «ريموشة» تقول في تدوينة فايسبوكية جديدة لها : « في زيارتي لولاية المهدية لأول مرة اللي انبهرت بها عندي مانقوللكم: الساعة نحيي الساحل الكل اللي فيه ناس تخدم على روحها في كل وقت وفي كل بلاصة ومهما كانت ....نحب نحيي خاصة قصيبة المديوني اللي فيها رجال وقفوا كلمة رجل واحد ضد التلوث البحري . قابس عمركم كامل تاكلوا في الصطاكة ولا عمركم وقفتوا مع بعضكم اش يجي التلوث متاعهم قدام التلوث متاعنا ؟ نحن فالحين كان هاكا منزلي هاكا جاري هاكا حامي وهاكا مطوي هاكا غنوشي ... فالحين كان في بعضنا كان الكلامات وهزان القفف فالحين كان نوكلوا في البراني ونخلي جاري جيعان.. فالحين نسكروا على بناتنا اما بنات الناس نورمال فالحين نتكلموا في الولايا واللي يتكلم على بنتكم تقتلوه فالحين نعسوا على بعضنا ... ابسط مثال كيف تجي تحكي مع بطال تعالى هاهي خدمة يقولك اني نخدم الخدمة هاكي «عقابها» وقت تخرج السبعة متاع الصباح تلقى الدنيا الكل مسكرة وقت تخرج الثمانية في الليل كيف كيف تلقاها مسكرة قال شنوه صقع والدنيا باردة وميتة ماثماش خدمة وكي تدور القهاوي تلقاها تفغم كيفاه تحبوا قابس تتبدل ؟ في بالي درت معظم الولايات والله مخي حبس بالرسمي ناس تجاهد على ولاياتها من نساء ورجال وشباب ناس تعطي ومايهمهاش كان باش تاخذ وإلا لا ناس تؤمن باللي ما يغير الله ما بقوم حتى يغيروا ما بأنفسهم ناس تحب بعضها لحمة واحدة ... حني لا نخدموا ولا نخلوا شكون يخدم لا نحاربوا على ولايتنا ولا نخلوا شكون يحارب لا نحبوا نكونوا الفوق ولا نخلوا شكون يكون فوقنا».