اِلْمثلْ اِشٙعْبِي اِقُولْ "ما يحِسْ اِجّمرة كان اِلّى يعفِسْ علِيها " وِ كْلامْنا قِياسْ بِخصُوصْ اللّي اِقولُولها "اِسْيابْ". ها ارْزِيّة الّي اِتعانِي مِنْها صفاقس توّة قداشْ منْ عامْ . هٙا الْبلْية اللّي تِبْلات بِيها المسكينة توة سنينْ. وِ اِلْعرْكة بين اِزِّيتونة صفاقس و اللّي اِسٙميوٙهْ مصنعْ الْمُوت مُتواصلة تٙوة عٙنْدها مُدة . هيّ اِتقولْ اِبْغُصّة راكْ فدٙدْتني ، خنقتني ، قتلتني وُ هُو اِجاوبْ مُتْنٙفِخْ: أنا مؤسسة عمومية نُنْتِج و انْدخِلْ في الفلوسْ ! اِتْحِبْني اِنْسكِرْ! و متاعْ حقوق الانسان يتكلْمو وِ كُلْهم غُشْ : "وينو الحق في الحياة ،وينو الحق في الصحة" ، مصنع "اِسْيابْ" قاعِدْ اِصنّعْ في لٙمْراض اِلْخايبة .و لٙعْبٙاد قاعدة اِتْموت عِرقْ بعد عِرق بالتلوث! . والمسْهول متاع لِتِحادْ اِجاوِبْ بلغة نقابيّة : آشْ باشْ نعملُو في الخدامة متاع اِشّركة؟ و التنسيقية متاعْ حقوق البيئة اِتصيحْ وِ تْعيِّطْ : "يزّي" اِتّلوِثْ اِقْضى عٙ لخْضِر و عٙ الحوتة و فسِدْ لٙهْواء و الْماء! !SSPبوحدة جديدة اسمها TSPو مسهول لٙحْكومة اِجاوِبْ اِبْلُغة صعيبة و رْكيكة: ها هو ماشي اِنبدلو منظومة انتاج اِلْحسِيلو في هٙا العركّة المُرّة تعٙمْلِتْ اِلْعرايضْ و اِتْكِتبتْ الْمٙطالِبْ و حتى قصايِدْ الهِجاءْ في اِسْيابْ ، و مع المسْهول وِ لْڤايِدْ – مِنْ الفوقاني لِلْتحْتاني ومن لٙحْمرٙاني لِلْبنفْسجاني – اِتْنظْمِتْ لِجْتماعاتْ وِ لْمُلتقيات اِتْفٙسِرْ اِلْهاذا و تُقْنِع في لاخِرْ. وُ زِيدْ باشْ اِتْأكِدْ اِنْها تِحلِمْ بِرحيل اِرْزيّة خرْجِتْ الصفاقسية حتّى في الْمُظاهرات و الْمٙسيراتْ. يا سيدي قريبْ اِتْولِي ها اِسْيابْ مُسِتعمِرْ و اشْعْب في صفاقس اِطالِبْ بالجلاء الجلاء . لكن لا حياة لِمٙنْ تُنادي ! يا خي ها السّيابْ تعرِفْ معنى الحياة هِيّ باشْ تسْتجيبْ !