تورس : بالفيديو: كلمات مؤثرة للسعد الوسلاتي في كواليس الحلقة الأخيرة من ''حرقة''..

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

بالفيديو: كلمات مؤثرة للسعد الوسلاتي في كواليس الحلقة الأخيرة من ''حرقة''..

تونسكوب نشر في تونسكوب يوم 22 - 04 - 2022

نشر مخرج مسلسل حرقة الذي عرض خلال شهر رمضان على القناة الوطنية الاولى فيديو من كواليس الحلقة الاخيرة من المسلسل الذي حظي بالاعجاب من قبل النقاد والمشاهدين.
وبكلمات مؤثرة تحدّث الوسلاتي عن تجربته في الاخراج مع الوطنية الاولى ونجاح مسلسل المايسترو والجزء1 و2 من حرقة قائلا:
"عمرنا ما سألنا رواحنا.. يا القانون أعمى.. يا نحنا عمِّي ما نعرفوش نقراو.." - المايسترو، رمضان 2019
"كلنا ما نسوو شيء.. تعرفي التفش؟ حنا تفش.. ما يشبحلنا حد.. و كي يضيع حد منا.. ما يتحسش.." - حرقة 1 - رمضان 2021
"ريحتنا خايبة يا نعمة.. خايبة.. تذكرهم بزبلتهم.." - حرقة 2 - رمضان 2022
جمل و كلمات من بين مئات و آلاف اللي تكتبو في سيناريوهات كانو كيما الحلمة… حلمة بدات في 2018.. نهارتها كنا أنا و عماد الدين الحكيم في الطريق نحو الجزائر بعد ما فقدنا الأمل في تونس و أيسنا.. وقتها جانا تلفون من التلفزة و قالولنا اللي هوما قبلو سيناريو مسلسل المايسترو..
الفرحة كانت منقوصة.. التلفزة حبّت تاخو السيناريو من غير المخرج.. جوابي كان واضح، المايسترو هو الخطوة الأولى من حلمة فيها ثلاثة قصص و مانيش باش نسلّم.. شدّينا الصحيح و نجحنا في إقناعهم و خدمنا الخطوة الأولى من الثلاثية..
أطفال في إصلاحية، كل واحد منهم يحكي قصة معاناة و قصة ظروف خلاتو يوصل غادي.. في وقت كان صعيب برشا عمل كيما المايسترو يتعدى في التلفزة الوطنية.. أو يتحكى على موضوع الاصلاحية حتى في تقرير في بلايص أخرى... لكنها لم تكن سوى البداية..
الخطوة الثانية كانت الخروج من الإصلاحية و شقّان البحر.. في الحرقة.. طريق كان يراه البعض طريقاً نحو الجنة.. من الشقف.. لمراكز الإيواء.. لقصص الناس الي تخمم في الحرقة.. لإحساس عائلات المفقودين.. برشا حكايات.. برشا قصص.. و برشا تفاصيل بين السطور.. الخطوة الثانية من الحلمة الثلاثية زادتنا اقتناع أنو الناس فهمتنا و فهمت وين نحبو نوصلو.. الجزء الثاني من الحلمة عطانا القوة للمواصلة نحو الثلاثية..
اليوم الحلقة الأخيرة من حرقة 2.. اليوم الحلقة الأخيرة من الثلاثية.. اليوم الحلقة الأخيرة من حلمة تعّبتنا برشا.. تعب نسيناه كي رينا ردود فعلكم و نقدكم و شكركم و كل ملاحظاتكم.. كنا كل مرة نقراو اللي يتكتب نحسو ببرشا فخر و برشا حب..
برشا قالو اللي المايسترو، حرقة 1 و حرقة 2 قدّمو صورة سوداء عن تونس و على التوانسة اللي دخلو للإصلاحية و اللي يحرقو لإيطاليا.. لم يكن الهدف.. الهدف كان كونو نصدمو الناس باش نساهمو في إيجاد الحلول.. كنا نجمو نحكيو مثلاً على الناس اللي حرقت و نجحت في حياتها.. لكن هذا كان إختيار من الفريق.. الناس كان لازم نشوف الضفة الأخرى و الحقيقة الأخرى من الطريق إلى الجنة..
اليوم وقت الشكر.. و غدوة وقت الانطلاق في أحلام أخرى.. أحلام نستمد قوتها من تعاليقكم و من أفكاركم.. و خاصة من واقع بلادنا.. لأنو عنا شعور بالواجب تجاه بلادنا..
نشكر كل من آمن بينا.. كل من ساهم في في الثلاثية، و كل من خلى المشروع الإنساني هذا يخرج للمشاهد في التصويرة الرائعة اللي شفناها..
نشكر شركة ديجيبرو و سي رضا سلامة و عزيز سلامة
نشكر التلفزة التونسية بإدارتها من 2018 الى 2022 على ثقتهم فينا رغم كل الصعوبات وكانت سند للمشاريع الثلاثة وخدمنا بكل حرية و نتمني نكونو كنا عند الثقة
نشكر رفيق دربي عماد الدين الحكيم نقلو أي وقتاه نبداو نكتبو الجاي (ههه)
نشكر كل شخص دعم الثلاثية ووقف معانا..
نشكر كل ڤروبات الفايسبوك اللي تبنات مايسترو و حرقة 1 و 2… كل من شكرنا و كل من نقدنا..
ثلاثية تعبتنا وأرقتنا و إستمتعنا فيها خاطر خدمناها ببرشة صدق و حب وكيف
لازمنا نفتخرو إلي عنا فتونس تقنين فمستوى عالمي و عنا ممثلين صادقين
نتمني فالبلاد هاذي نفهمو قيمة الفن والثقافة في اصلاح البلاد و إعطاها قيمة"
نشكر زوجتي أميمة إلي كانت السند و قفت معايا و نقول لبيرم وغسان نتمني تكونو فخورين بإلي عملناه
الله يرحم مدام نجوي سلامة و صديقي وإلى علمني الإحترافية إلياس الزرلي
ونشكر مرا وقفت معايا في بداياتي وكانت سند مدام سلمى بكار ربي يطول فعمرها
نشكر كل شخص ساعدني وعلمني ونصحني فكل مسيرتي الصغيرة
اليوم وفات حلمة الثلاثية.. و غدوة تبدى حلمة أخرى.. نلتقي! »

انقر هنا لقراءة الخبر من مصدره.